Sólskinsdrengurinn... Ímyndaðu þér að þú gætir ekki haft samband við umheiminn. Þú gætir ekki tjáð líðan þína – ófær um að koma löngunum þínum, draumum og þrám til skila, þótt þær væru ekki minni en hjá öðru fólki. Ímyndaðu þér að þú reiddir þig á aðstoð annarra við einföldustu daglegu verk, eins og að klæða þig og borða. Ímyndaðu þér að þú værir fastur inni í skel. Heimildamyndin Sólskinsdrengurinn í leikstjórn Friðriks Þórs Friðrikssonar segir sögu Margrétar, sem hefur reynt allt til að koma syni sínum til hjálpar. Keli er ellefu ára og með hæsta stig einhverfu – mamma hans veit ekki einu sinni hvort hann skilur íslensku, hvað þá önnur tungumál. Þótt Margrét eygi ekki mikla von fyrir hönd Kela brenna á henni margar spurningar um það dularfulla og flókna ástand sem einhverfa er. Hún heldur til Bandaríkjanna, þar sem hún kynnis vísindamönnum á sviði einhverfu og meðferðar við henni og foreldrum einhverfra barna sem eiga sama baráttumál og hún; að brjóta niður múrinn milli barnann og umheimsins. Þessi vegferð verður lengri og afdrifaríkar en hún ætlaði í upphafi. Í ferðinni kveiknar von um að hægt sé að hjálpa syni hennar meira en hún hafði áður talið. Ef til vill er hægt að brjóta niður einhverfumúrinn og kynnast einstaklingnum sjálfum?